యువతకు ఉపాధే లక్ష్యం.. సమగ్ర కార్యాచరణకు కలెక్టర్ కోయ శ్రీహర్ష ఆదేశం

 ఇది మన హక్కు పెద్దపల్లి జిల్లా బ్యూరో రిపోర్టర్ ✍️

యువతకు ఉపాధే లక్ష్యం.. సమగ్ర కార్యాచరణకు కలెక్టర్ కోయ శ్రీహర్ష ఆదేశం

పోలీస్ ఉద్యోగాలకు ఉచిత శిక్షణ, వసతి–భోజన సౌకర్యాలు.. పరిశ్రమలకు అవసరమైన నైపుణ్యాలతో యువతను తీర్చిదిద్దాలి

రామగుండం, జూలై 28 (ఇది మన హక్కు): జిల్లాలోని యువతకు ప్రభుత్వ, ప్రైవేట్ రంగాల్లో విస్తృత స్థాయిలో ఉపాధి అవకాశాలు కల్పించేందుకు అన్ని శాఖలు సమన్వయంతో పనిచేస్తూ సమగ్ర కార్యాచరణ ప్రణాళిక రూపొందించాలని జిల్లా కలెక్టర్ కోయ శ్రీహర్ష అధికారులను ఆదేశించారు. మంగళవారం సమీకృత జిల్లా కలెక్టరేట్ (IDOC)లో నిర్వహించిన జిల్లా ఉపాధి, నైపుణ్యాభివృద్ధి సమీక్ష సమావేశంలో ఆయన పలు కీలక సూచనలు చేశారు.

ఈ సందర్భంగా కలెక్టర్ మాట్లాడుతూ, రాష్ట్ర ప్రభుత్వం చేపట్టనున్న సుమారు 7,300 పోలీసు ఉద్యోగాల భర్తీ నేపథ్యంలో పెద్దపల్లి జిల్లాకు చెందిన యువత అత్యధిక సంఖ్యలో ఉద్యోగాలు సాధించేలా ప్రత్యేక కార్యాచరణ రూపొందించాలని అధికారులను ఆదేశించారు. అభ్యర్థులకు నాణ్యమైన అధ్యాపకులతో ఉచిత శిక్షణ అందించడంతో పాటు వసతి, భోజన సౌకర్యాలు కల్పించేలా ప్రత్యేక శిక్షణా కేంద్రాలు ఏర్పాటు చేయాలని సూచించారు.

రాష్ట్రంలో వేగంగా విస్తరిస్తున్న పరిశ్రమల అవసరాలకు అనుగుణంగా యువతకు నైపుణ్యాభివృద్ధి శిక్షణ అందించాలని కలెక్టర్ పేర్కొన్నారు. పరిశ్రమలకు అవసరమైన సాంకేతిక నైపుణ్యాలను ముందుగానే నేర్పించడం ద్వారా జిల్లాకు మరిన్ని ఉద్యోగ అవకాశాలు తీసుకురావచ్చని తెలిపారు.

గ్రామీణ యువతకు ప్రభుత్వ ఉపాధి, నైపుణ్యాభివృద్ధి కార్యక్రమాలపై పూర్తి అవగాహన కల్పించేందుకు పంచాయతీ కార్యదర్శులను కూడా భాగస్వామ్యం చేయాలని సూచించారు. ప్రతి గ్రామంలో అర్హులైన యువతను గుర్తించి, వారికి అందుబాటులో ఉన్న శిక్షణా కార్యక్రమాలు, ఉద్యోగ అవకాశాలు, స్వయం ఉపాధి పథకాలపై విస్తృత ప్రచారం నిర్వహించాలని అధికారులకు ఆదేశించారు.

ఫాక్స్‌కాన్ వంటి ప్రముఖ సంస్థలు ఐటీఐ, ఏటీసీ విద్యార్థుల నియామకానికి ఆసక్తి చూపుతున్న నేపథ్యంలో ఆయా విద్యాసంస్థల్లో పరిశ్రమల అవసరాలకు అనుగుణంగా ప్రత్యేక నైపుణ్య శిక్షణ అందించాలని సూచించారు. దీంతో జిల్లాకు చెందిన యువతకు ప్రైవేట్ రంగంలో మెరుగైన ఉపాధి అవకాశాలు లభిస్తాయని పేర్కొన్నారు.

అలాగే జిల్లాలోని నర్సింగ్ కళాశాలల విద్యార్థులకు టామ్‌కామ్ (TOMCOM) ద్వారా జపాన్, జర్మనీ వంటి దేశాల్లో లభిస్తున్న ఉపాధి అవకాశాలపై అవగాహన కల్పించాలని ఆదేశించారు. విదేశీ ఉద్యోగాలకు అవసరమైన భాషా శిక్షణతో పాటు ఇతర ప్రత్యేక శిక్షణలను కూడా అందుబాటులోకి తీసుకురావాలని సూచించారు.

ఎన్‌ఏసీ (NAC) అకాడమీ నిర్వహిస్తున్న నైపుణ్యాభివృద్ధి కోర్సులపై యువతలో విస్తృత ప్రచారం నిర్వహించి, ఆసక్తి గల అభ్యర్థులను ఆ కోర్సుల్లో చేరేలా చర్యలు తీసుకోవాలని అధికారులను ఆదేశించారు. ఉపాధి కల్పనలో అన్ని శాఖలు సమన్వయంతో పనిచేస్తే జిల్లాలో నిరుద్యోగ సమస్యను గణనీయంగా తగ్గించవచ్చని కలెక్టర్ పేర్కొన్నారు.

సమావేశంలో కలెక్టరేట్ ఏఓ బి. ప్రకాష్, సీపీఓ జి. రవీందర్, జిల్లా ఉపాధి అధికారి రాజశేఖర్, జిల్లా మార్కెటింగ్ అధికారి ప్రవీణ్, టాస్క్ మేనేజర్ కౌసల్య, జిల్లా ఇంటర్మీడియట్ విద్యాధికారి కల్పనతో పాటు సంబంధిత శాఖల అధికారులు పాల్గొన్నారు.

ఇది మన హక్కు సమాచార పత్రిక✍️